الجديد برس : رأي
عمر القاضي
يا ليالي بلغيهم أن خالد اليماني لقيهم. واجتمع فيهم، وقال إن نتنياهو حالي.
يا ليالي احذري يشتروا لحنك الشجي. ومعاني أنا فيها وانتي. لحن حبا. يخبئ الماضي والآتي معاً. معاني واماني يا ليالي والشاهد الله. ما أنساك ولا تنساني كلانا تحت القصف والحصار يا ليالي.
يا ليالي لو تدري كم حقدهم علينا. لدعيتي عليهم صباحات ومساء يا ليالي.
يا ليالي قد خلق الله شاهدوا اليماني راح صليهم. لا تصدقي أن إيران هدفهم.
يا ليالي أنتي أخبر أنتي داري. كل اجتماع طاري. على إيران تروح ليلة الجن صلينا. يا تعب حالي ما هذا الدبور يا ليالي.
يا ليالي لا تصدقي أن العدوان نسينا. وإن ذكر عليه اللعنة إذا انتصر بالجرائم وقتل الأطفال ولا بشيء ثاني. وانتي يا ليالي إذا عد في عيش وملح بيننا ذكرتينا. لكن مش مهم يا ليالي.
الأهم يتركوا لنا حالنا. اليمن عالي صعب عليهم. وغالي علينا. ومن يباحث شعب اليمن. ما لأبوه إلا المسيَّر والتوشكا وأزيز الرصاص الذماري. تخبط كل دانق داني. جاء بيحتل صنعاء. مرة من الفرضة ومرة من السياني. في اليمن رجال أبطال يسبرون الأعوج ساني.
وإلا ما اليماني أصلع عميل فاني، قالوا رأسه صلع من العمل الإنساني. يا عيني. مجرم حرب مرتزق جاني. لكن يخندقها. يجتمع بالصهيوني والنصراني. يجتمع بحيفا ولا بالزبداني.
يا ليالي خبري خالد اليماني لو يقعد مع يهود بني قريضة كلهم، ويدهنوا صلعته بزيت الخردل مجاني. ما فيش صلعة عميل ترجع صيفاني. ولن تعود اليمن مرة ثاني.
يا ليالي أنتي داري أننا ما ظلمنا أحد. أنتي أدرى أنه لو وقع زلزال آخر الدنيا ولا في السليماني. نحشد لهم الفرش والبطانيات والطحين في ثواني.
يا ليالي بروحك الحالي السالي. بالله عليك يرضيك الفرغ الحاقدين بنو سعود وعيال نهيان اللي إلى قبل أمس وهم يجروا بالصحاري عرطوط يلحق عاري. بتكلم عن الثاني اللي معه دولة سع مديرية حيس. عد حيس أكبر منها بحوالي كم هكتارِ.
هيا يا ليالي هذا اللقيط ابن النخيط ابن ستين شريط. يشتي يلفلف جزرنا مع السواحل والأشجارِ.
والله ما سبرت يا ليالي. لو يغنيك ماجد المهندس وألف فنان أناني. أنت داري ما تنازل واحد منهم يذكر أنك قصيدة يمنية وكاتبك شاعر صنعاني. طبعهم من زمان يلطشوا التراث حقنا كلمات مع اللحن مع الأغاني. يا ليالي لطشوا أغلب تماثيلنا اليمنية القديمة مع الأواني.
المهم أنتي داري ما ليالي يا ليالي إلا بصوت صنعاني هادئ على دقة العود وهات يا ليالي في اليمن لحنها وذوقها ثاني.
